ከወረዳው የህዝብ ቁጥር ጋር የሚመጣጠን የዜጎችን የማልማት አቅም በማሳደግ የምግብ ዋስትናን እንዲረጋገጥ ለስነ-ህዝብ ተግባር ትኩረት ሰጥቶ መስራት እንደሚገባ ተገለፀ።
ህዳር 1/2018 ዓም
በጉራጌ ዞን እዣ ወረዳ የስነህዝብ ምክርቤትና ቴክኒክ ኮሚቴ ለማቋቋም የውይይት መድረክ ተካሂዷል ።
የእዣ ወረዳ ም/አስተዳዳሪና የትምህርት ፅ/ቤት ሀላፊ አቶ ተጠምቀ በርጋ በመድረኩ ተገኝተው እንደተናገሩት መንግስት የህዝቡን የኑሮ ሁኔታ ለማሻሻልና ፈጣንና ዘላቂ ልማት ዕውን ለማድረግ ጥረት እያደረገ ይገኛል።
የሰው ሀይል ልማት ላይ መስራት እና ያለዉን የህዝብ ቁጥር ካለን የኢኮኖሚ አቅም ጋር እንዲመጣጠን ማድረግ ይገባል ያሉት ም/አስተዳዳሪው የማህበረሰቡ ፍላጎት ካለው የኢኮኖሚ አቅም ጋር መመጣጠን ካልቻለ ለስራ አጥነት ቁጥር መጨመር እና ሌሎችም ተያያዥ ማህበራዊ ቀውሶች ሊፈጠሩ እንደሚችሉ በመረዳት ለዚህ ዘርፍ ትኩረት መስጠት ያስፈልጋል ።
በመሆኑም በዛሬው እለት የተቋቋሙትን የስነ ህዝብ ምክር ቤት ኮሜቴ ተግባርና ሀላፊነታቸው በአግባቡ ሊወጡ እንደሚገባም ተናግረዋል።
የእዣ ወረዳ ፕላንና ኢኮኖሚ ልማት ፅ/ቤት ሀላፊ አቶ ደመቀ ሀብቴ በበኩላቸው ስነ ህዝብ በባህሪው ዘርፉ ብዙ እንደመሆኑ መጠን ስነህዝብ በአንድ መ/ቤት ወይም ተቋም የተናጥል እርምጃ ብቻ የሚፈታ ጉዳይ ሳይሆን የተለያዩ ሴ/ር መ/ቤቶችና ድርጅቶችን የተባበረና የተቀናጀ ጥረት የሚጠይቅ አብይ የልማት አጀንዳ ነው፡፡
በመሆኑም በወረዳው የስነ ህዝብ ስራዎችን በበላይነት የሚያስተባብርና የሚመራ የስነ ህዝብ ምከር ቤትና ከተለያዩ ሴክተር መ/ቤቶች ተውጣቶ በስነ ህዝብ ጉዳይ የሜንስትሪሚንግ ተግባር ሲያከናውንና ቴክኒካዊ ድጋፍ ሲሰጥ የነበረን የቴክኒክ ኮሚቴ አጠናክሮ ለማስቀጠል እንዲቻል ይህ የስነ ህዝብ ምከር ቤትና የቴክኒክ ኮሚቴ ማቋቋሚያ አስፈላጊ ሆኖ መገኘቱንም አመላክተዋል።
በቀጣይም እነዚህ አካላት የተቀናጀ አሰራር በመፍጠር የስነህዝብ ጉዳይ ከልማት ዕቅድ ጋር በማሳለጥ ዘላቂ ልማትና ተጠቃሚነትን ለማረጋገጥ በባለቤትነትመንፈስ ሊሰሩ እንደሚገባም ተናግረዋል ።
ተሳታፊዎቹም በሰጡት አስተያየትም ከወረዳው የህዝብ ቁጥር ጋር የሚመጣጠን የዜጎችን የማልማት አቅም በማሳደግ የምግብ ዋስትናን እንዲረጋገጥ ለስነ-ህዝብ ተግባር ትኩረት ሰጥቶ መስራት እንደሚገባ ገልፀው ለዚህም ዛሬ የተቋቋሙትን የስነህዝብ ምክር ቤት ኮሚቴዎች በተናበበና በተቀናጀ መንገድ መስራት ይገባቸዋልም ብለዋል።