የእዣ ወረዳ ኢኖቬሽንና ቴክኖሎጂ ጽ/ቤት

ለምለም ቀዬ፤ ዘመነኛ ጥበበኛ መሃንዲስ አልቀየሰውም።

በዚህ መንደር ተፈጥሮና ተለምዶ ተሰባጥረዋል፤ የኑባሬ በይነ-ፈርጆች ተዋደዋል። ይህን ለዕይታ ማራኪ፣ መንፈስን በሐሴት አርኪ፣ በተመስጦ ቀልብ ወስዋሽ፣ ትሩፋተ-ብዙው ለምለም ቀዬ፤ ዘመነኛ ጥበበኛ መሃንዲስ አልቀየሰውም።

የዘመናችን የአካባቢ ስነ-ውበት ባለሙያ አልተጨነቀበትም። የምትሃተኛ ኪነ-ህንፃ ባለሙያ፣ የዝነኛ የገጸ- ምድር ንድፈኛ ውጤት አይደለም። ዘመናዊ የሥርዓተ-ምኅዳር ሳይንቲስቶች አሻራም አላረፈበትም።

ሥሪቱም፣ መሠረቱም፣ ትዕምርቱም የጥንት የጥዋት ነው። የሀገር በቀል ዕውቀትና ጥበብ ማሳያ። ምዕተ- ዓመታት የተሻገረ የትውልድ ቅርስም፣ ውርስም።

የሀገረ-ስዊዘርላንድ ውድ መንደሮችን የሚያስንቀው ይህ ውብና ፅዱ መንደር፣ የጉራጌዎች ጀፎረ ነው።

በዘመናት ዑደት ውስጥ ከነግርማ ሞገሱ የተሻገረ የጉራጌ መንደሮች ባህላዊ ጎዳና፣ የትውፊታዊ ትዕይንቶች መድረክ ነው።

ባለሐመልማላዊ ገጹ ጀፎረ ለጉራጌ ማኅበረሰብ አንዱ መልክና ልክ፤ ግልጋሎቱም አድማስ ሰበር እና ዘመን ዘለል ነው።

በአባቶች ተረክ ጀፎረ ከሥራ ወዳዱ የጉራጌ ጥንተ-ማኅበረሰብ ዘንድ በንግድ እንቅስቃሴ ሂደት ተወጥኖ ከወትሮ እስከ ዘንድሮ ዘልቋል።

ጀፎረ ውበትና ጌጥ ብቻ አይደለም። ትውፊታዊ መልክና ግልጋሎቱ ፈርጀ-ብዙ ነው። በዘፈቀደ የሚሰመር ሳይሆን የራሱ የአሰማመርና የልኬት ስልት ይመራል።