ርዕሰ መስተዳደር ዶ/ር እንዳሻው ጣሰው በዛሬው እለት

=====ርዕሰ መስተዳደር ዶ/ር እንዳሻው ጣሰው በዛሬው እለት

ከፌደራል ፓርላማ እና ከክልል ህዝብ ተወካዮች ምክር ቤት አባላት ጋር በነበራቸው የውይይት መድረክ ያነሷቸው ዋና ዋና ነጥቦች

👉 በብልጽግና ዘመን የምንከተለው መሰረታዊ እሳቤ የማይጠናቀቅ ፕሮጀክት አንጀምርም።

👉በክልሉ የተመረጡ አበይት የልማት አጀንዳዎች በጥብቅ ዲሲፕሊን እንዲመሩ እየተሰራ ነው።

👉 በክልሉ በእያንዳንዱ ወረዳ እና ቀበሌ ስንት የጤና፣የትምህርት ፣የውሃ፣የቴሌኮሙኒኬሽን አገልግሎት ሌሎችም ፣የተጠቃሚ ብዛት እና ሌሎች መረጃዎችን በቆጠራ የማዘጋጀት ስራ ተሰርቷል።

👉 በቂ መረጃ ከሌለ ስራ መምራት አይቻልም መረጃዎችን በርዕሰ መስተዳድር አማካሪዎች እና በፕላን እና ልማት ቢሮ አማካኝነት ጥናት ማካሔድ ተችሏል።

👉የጸጥታ፣የግብርና፣የገቢ፣የትምህርት፣የጤና፣የስራ እድል ፈጠራ፣ መሰረተ ልማት፣ንግድ እና ኢንቬስትመንት እንዲሁም ከተረጂነት ወደ ምርታማነት በየ እለቱ ክትትል የሚደረግባቸው አጀንዳዎች ናቸው።

👉 የክልሉ መንግስት ተመስርቶ ስራ ሲጀምር ከፍተኛ የእዳ ጫና ነበረበት ሆኖም ግን ጫናዎችን በመቋቋም መደበኛ ስራ ማስቀጠል ተችሏል።

👉 የ2016 በጀት ዓመት የምርት ዘመን የ3 ቢሊየን ብር ማዳበሪያ እንዲቀርብ ተደርጓል።

👉 ከአዳዲስ ይልቅ የነባር ፕሮጀክቶችን ግንባታ ለማጠናቀቅ እየተሰራ ነው።

👉 ሆኖም ግን በክልሉ በአንድ ከተማ አንድ ፕሮጀክቶች በሚል እሳቤ 90 ፕሮጀክቶች በመቅረጽ ወደ ተግባር ተገብቷል። ከነዚህ ውስጥ 18 ያህሉ መድሀኒት ቤቶች ናቸው።

👉 የተጀመሩት ፕሮጀክቶች 1 ነጥብ 4 ቢሊየን ብር ወጪ የሚደረግባቸው ሲሆን ከ2 ነጥብ 5 ሚሊየን በላይ ህዝብ ተጠቃሚ ያደርጋሉ።

👉 በክልሉ 165 ኪ/ሜ የኮሪደር ልማት ስራ ተግባራዊ ለማድረግ እየተሰራ ነው።

👉 ከመጋቢት 1/2017 ጀምሮ በ 4 ነጥብ 3 ቢሊየን ብር ወጪ በሰባት ከተሞች የቢሮ ግንባታ ይጀመራል።

👉 በክልሉ ባለፈው አመት ብቻ ከ5 ነጥብ 5 ቢሊየን ብር በላይ በህብረተሰብ ተሳትፎ የልማት ስራዎችን ማከናወን ተችሏል።

👉 ኢኮኖሚው የሚያመነጨውን ገቢ በተገቢው መንገድ ለመሰብሰብ ግብ ተጥሎ እየተሰራ ነው።

👉የገቢ መሰረት ለማስፋት አዳዲስ አዋጆች አውጥተናል።

👉 በዚህ አመት ለ 350 ሺ ዜጎች የስራ እድል ለመፍጠር ታቅዷል።

👉 እስካሁን ባለው አፈጻጸም ለ215ሺ ዜጎች የስራ እድል ማሳካት ችለናል።

👉 በቡናና ቅመማ ቅመም ዘርፍ የኤክስፖርት አቅማችንን ለማሳደግ መስራት ይገባል።

ዘገባው የክልሉ መንግስት ኮሙኒኬሽን ጉዳዮች ቢሮ ነው።

ለአገና ጤና ጣቢያ የአልትራሳውንድ የህክምና መሳሪያ ድጋፍ የተደረገ በመሆኑ በቅርብ ቀን አገልግሎት መስጠት እንደሚጀምር ተቋሙ አስታውቋል ።

========ለአገና ጤና ጣቢያ የአልትራሳውንድ የህክምና መሳሪያ ድጋፍ የተደረገ በመሆኑ በቅርብ ቀን አገልግሎት መስጠት እንደሚጀምር ተቋሙ አስታውቋል ።

ይህ በክልሉ ጤና ቢሮ በኩል ድጋፍ የተደረገው የአልቶራሳውንዱ መሳሪያ እርጉዝ እናቶች ወደ ሌላ የህክምና ተቋም በመሄድ ይደርስባቸው የነበረው እንግልት የሚያስቀር ሲሆን የረጅም ጊዜ የተቋሙ ብሎም የማህበረሰቡ ጥያቄ ምላሽ ያገኘበት ተግባር መሆኑንም ተጠቁሟል።

የአገና ጤና ጣቢያ ሀላፊ አቶ ሸምሱ ከድር እንዳሉት ጤና ጣቢያው ገልግሎት መስጠት ከጀመረበት ከረጅም ጊዜ አንስቶ ለበርካታ የማህበረሰብ ክፍሎች ሲያገለግል ቆይቷል ።

ጤና ጣቢያው ከሚሰጣቸው የህክምና አገልግሎት አንዱና ዋንኛው የእናቶችና ህፃናት ሞት ለመቀነስ የሚደረግ አገልግሎት ሲሆን በዚህም ረገድ እንደ ክልሉ ብሎም እንደ ሀገር ተሞክሮ የሚሆኑ ተግባራቶች እያከናወነ እንደሚገኝም ሀላፊው ጨምረው ተናግረዋል።

በተለይም የእርጉዝ እናቶች ማረፊያ አገልግሎት በመጀመር እናቶች በሰለጠነ ባለሙያ በጤና ተቋም እንዲገላገሉ በማድረጉ ረገድ ውጤታማ ስራ እየተሰራ እንደሚገኝ የገለፁት አቶ ሸምሱ ለዚህም የሚያግዝ የእናቶች ማረፊያ ክፍል በመገንባት እናቶች እንደራሳቸው ቤት ምቾት እንዲሰማቸው ለማድረግ ከማህበረሰቡ ጋር በመቀናጀት በርካታ ተግባራት እየተሰሩ እንደሆነም አስረድተዋል ።

በበጀት ዓመቱ በጤና ጣቢያው በእስካሁን ሂደት በርካታ እናቶች የቅድመ ወልዲ አገልግሎት በመስጠት ከታቀደው 108% ያህል መፈፀሙን የጠቆሙት ሀላፊው በግማሽ ዓመቱ ከታቀደው 105% እናቶች የወሊድ አገልግሎት ተሰጥቷልም ብለዋል ።

ይህ በክልሉ በክልሉ በኩል ድጋፍ የተደረገው የአልትራሳውንድ መሳሪያ ከዚህ በፊት ለጅም ጊዜ ጥያቄ እንደነበር ያስታወሱት አቶ ሸምሱ ይህም ከወሊድ ጋር ተያይዞ ትክክለኛ የፅንስ ሂደቶች በመከታተል ጤናማ እናትና ልጅ እንዲኖር ፋይዳው የጎላ መሆኑንም ገልፀዋል ።

የአልትራሳውንድ አገልግሎቱ በከተማ መስተዳደሩና በወረዳው የሚገኙ 14 ቀበሌዎች ተጠቃሚ በማድረግ በዓመት ከ600 በላይ የሚሆኑ እናቶች አገልግሎት መስጠት የሚያችል መሆኑንም የገለፁት ሀላፊው እናቶች ለዚህ አገልግሎት ሲሉ ወደ ሌላ ተቋም በመሄድ ይደርስባቸው የነበረው እንግልት የሚያስቀር በመሆኑንም ይህን ድጋፍ ላደረገው የክልሉ ጤና ቢሮ ምስጋናቸውን አቅርበዋል ።

በእናቶች ማረፊያ ክፍል አግኝተን ያነጋገርናቸው እናቶች በሰጡት አስተያየት በማረፊው ክፍላቸው ከህክምናው ክትትል በተጨማሪ ልክ ቤታቸው እንዳሉ አስፈላጊውን እንክብካቤ እየተደረገላቸው መሆኑን ገልፀው ከዚህ በተጨማሪ ሌላ ቦታ ሳይሄዱ በአቅራቢያቸው የአልትራሳውንድ ህክምና እንዲያገኙ ለደገፋቸው አካል ምስጋናቸውን አቅርበዋል።

ኢትዮጵያ በሀገር ውስጥ ተተኳሽ ከማምረት አልፎ ወደውጭ የመላክ ዐቅም አሳድጋለች- ጠቅላይ ሚኒስትር ዐቢይ (ዶ/ር)

=========ኢትዮጵያ በሀገር ውስጥ ተተኳሽ ከማምረት አልፎ ወደውጭ የመላክ ዐቅም አሳድጋለች- ጠቅላይ ሚኒስትር ዐቢይ (ዶ/ር)

የካቲት 26፣ 2017 ዓ.ም

ጠቅላይ ሚኒስትሩ የሆሚቾ ጥይት ፋብሪካን በጎበኙበት ወቅት፤ ኢትዮጵያ እንደ ታላቅ ሀገር ራስን የመቻል ጉዞዋን በማጠናከር ስሉጥ የሆነ የትውልድ ቅብብሎሽ ማረጋገጥ እንደሚገባት ተናግረዋል፡፡

ኢትዮጵያ ከዚህ ቀደም በሀገር ውስጥ ተተኳሽ ጥይቶችን የማምረት ሙከራዎች ብታደርግም፤ እስከዛሬ ሦስት ዓመት በፊት ድረስ ከውጭ በማስገባት ላይ ተመስርታ መቆየቷን አንስተዋል፡፡

አሁን ኢትዮጵያ በሀገር ውስጥ ተተኳሽ ከማምረት አልፎ ወደውጭ የመላክ አቅም አሳድጋለች ብለዋል ።

ይህ ርምጃ በምሉዕነት የተገነባ እና በሚገባ የታጠቀ የሀገር መከላከያ ሠራዊትን ከማረጋገጥ አንፃር አበረታች ሥራ ስለመሆኑ ጠቅሰዋል፡፡

ከመከላከያ ግብዓቶች ባሻገር ሀገር የራሷን ምግብ ፣ መድኃኒት እና አልባሳት በበቂ ሁኔታ በማምረት እውነተኛ በራስ ምርት መተማመንን ማረጋገጥ እንደሚገባትም ነው አስገንዝበዋል ሲል ኤፍቢሲ ዘግቧል።

በየቀበሌ ያሉ ስራስኪያጆች በወረዳው ሞዴል በሆነው ሸብራደን ቀበሌ

========በየቀበሌ ያሉ ስራስኪያጆች በወረዳው ሞዴል በሆነው ሸብራደን ቀበሌ ላይ የወሰዱትን ተሞክሮ በተግባር በማዋል በመረጃ የተደራጀ ተቋምና በአገልግሎት አሰጣጥ የረካ ማህበረሰብ እንዲፈጠር የተቻላቸውን ሁሉ ማድረግ እንዳለባቸው ተገለፀ ።

በጉራጌ ዞን የእዣ ወረዳ ፐብሊክ ሰርቪስና የሰው ሀብት ልማት ፅ/ቤት የ2017 ዓ.ም የመጀመሪያ ግማሽ ዓመት የስራ አፈፃፀም የገመገመ ሲሆን እንደ ወረዳው ሞዴል በሆነው ሸብራደን ቀበሌ ላይ የልምድ ልውውጥ ፕሮግራም አካሂዷል።

የእዣ ወረዳ ፐብሊክ ሰርቪስና የሰው ሀብት ልማት ፅ/ቤት ሀላፊ አቶ ሰለሞን ዘርጋ እንደገለፁት በየደጃው ያለው ፐብሊክ ሰርቫንት የአገልግሎት አሰጣጥ ስርአቱ በማሻሻል ለማህበረሰቡ ቀልጣፋና ጥራት ያለው አገልግሎት በመስጠት ስራአስኪያጆች የተጣለባቸው ሀላፊነት በአግባቡ መወጣት ይገባቸዋል።

በየቀበሌው የሚገኙ ስራአስኪያጆች የተሰጣቸው ሀላፊነት በአገልጋይነት ስሜት ለችግሮች ቶሎ መፍትሔ በማበጀት ደከመኝ ሰለቸኝ ሳይሉ ለህብረተሰቡ በቅንነት እና በታማኝነት ማገልገል እንዳለባቸውም ሀላፊው ጨምረው ተናግረዋል።

እንደ ወረዳው ልምድ ሊቀስሙበት በማለም በዛሬው እለት ምልከታ የተደረገበት ሸብራደን ቀበሌ በወረዳ ተቋማት ደረጃ ጭምር ተሞክሮ የሚሆን ጠንካራና ግልፅ የመረጃ አደረጃጀት ስርዓት የታየበት ነው ያሉት አቶ ሰለሞን ይህም በአግባቡ ከተሰራ ምንያክል ለውጥ ማምጣት እንደሚቻል በቅጡ ተገንዝበው ስራአስኪያጆች በየቀበሌአቸው ተሞክሮውን ማስፋት እንዳለባቸውም መልዕክት አስተላልፈዋል ።

የእዣ ወረዳ ፐብሊክ ሰርቪስና የሰው ሀብት ልማት ፅ/ቤት ምክትል ሀላፊና የሪፎርም ዘርፍ አስተባባሪ አቶ ጌትነት ወልዴ በበኩላቸው በየቀበሌው የሚገኙ ስራአስኪያጆች ተጠያቂነትና ሀላፊነት በሚሰማው መልኩ በአግባቡ በመስራት ራሳቸው ፡ ተቋማቸው እንዲሁም ወረዳቸው በአፈፃፀም ደረጃ ጥሩ እንዲሆኑ ሊሰሩ ይገባል ብለዋል።

እንደ ወረዳው በየቀበሌው ጠንካራ ስራአስኪያጆች ለማብቃት በተለያየ መልኩ ስልጠና የመስጠት ፡ የድጋፍና ክትትል ስራዎች እየተሰሩ መሆኑን ያመላከቱት ም/ ሀላፊው በበጀት ዓመቱ ግማሽ ዓመትም በርካታ ጠንካራ ስራዎች መሰራታቸውንና በቀጣይም በጉድለት የተጠቀሱትን ቶሎ በማረም የማህበረሰቡ አገልግሎት አሰጣጥ ማሳደግ እንደሚገባቸውም አስገንዝበዋል።

እንደ ወረዳው በጥንካሬ ከሚጠቀሱ የቀበሌ ተቋማት መካከል የሸብራደን ቀበሌ አንዱ መሆኑን የጠቆሙት አቶ ጌትነት በዛሬውም የልምድ ልውውጡ ላይ የታዩት እጅግ አስተማሪና ጠንካራ የመርጃ አደረጃጀት ስርዓቶች በሁሉም ቀበሌዎች ተግባራዊ እንዲሆኑ በቂ ልምድ በመውሰድ ስራአስኪያጆች በየቀበሌያቸው ተሞክሮውን ተግባራዊ በማድረግ የሚጠበቅባቸውን ሀላፊነት በአግባቡ ሊወጡ ይገባልም ብለዋል።

ተሳታፊዎችም በሰጡት አስተያየትም በሸብራደን ቀበሌ ያየነው እጅግ አስተማሪ የሆነ ተግባር እራሳችን የቱጋ መሆናችን እንድንፈትሽ የቤት ስራ የሰጠን አስተማሪ ተግባር በመሆኑ በቀጣይም መሰል የልምድ ልውውጥ መድረኮች መጠናከር እንዳለባቸውም ተናግረዋል።

አስተያየት ሰጪዎቹ አያይዘውም እንደየቀበሌያቸው በ6 ወሩ በአፈፃፀም ወቅት በጉድለት የተነሱትን በማረምና በጥንካሬ የተነሱትን በላቀ መልኩ አጠናክሮ በማስቀጠል ማህበረሰቡ ለማገልገል ተዘጋጅተናልም ብለዋል ሲል የዘገበው የእዣ ወረዳ መንግስት ኮሚኒኬሽን ጉዳዮች ፅ/ቤት ነው።

ርዕሰ መስተዳድር እንዳሻው ጣሰው (ዶ/ር) ለኢፌዴሪ ጤና ሚኒስትር ዶ/ር መቅደስ ዳባ በጽ/ቤታቸው አቀባበል አደረጉ

=============ርዕሰ መስተዳድር እንዳሻው ጣሰው (ዶ/ር) ለኢፌዴሪ ጤና ሚኒስትር ዶ/ር መቅደስ ዳባ በጽ/ቤታቸው አቀባበል አደረጉ

የካቲት 23/2017 ዓ.ም

የማዕከላዊ ኢትዮጵያ ክልል ርዕሰ መስተዳድር እንዳሻው ጣሰው (ዶ/ር) በኢፌዴሪ ጤና ሚኒስትር ዶ/ር መቅደስ ዳባ ለተመራ ልኡክ በጽ/ቤታቸው አቀባበል አድርገዋል።

የማዕከላዊ ኢትዮጵያ ክልል ርዕሰ መስተዳድር እንዳሻው ጣሰው (ዶ/ር) ከልኡካን ቡድኑ ጋር በነበራቸው ቆይታ እንደገለጹት የክልሉ መንግስት ተመስርቶ ወደ ተግባር ከገባበት ጊዜ ጀምሮ የጤና ሚኒስቴር ድጋፍ ማድረጉን ተናግረዋል።

ክልሉ ሲመሰረት ከነባሩ ክልል የተላለፈ ከፍተኛ የእዳ ጫና እንደነበር የተናገሩት ርዕሰ መስተዳድሩ ከ4 ነጥብ 8 እስከ 5 ቢሊየን ብር እዳ ስለመከፈሉ አብራርተዋል።

ምንም እንኳን ክልሉ በበርካታ የበጀት ጫናዎች ውስጥ ቢያልፍም በተለያዩ ከተሞች 7 የቢሮ ግንባታ ስራ መጀመር የሚያስችለውን ዝግጅት ማጠናቀቁን ርዕሰ መስተዳድሩ ለልኡካን ቡድኑ አብራርተዋል።

መንግስታዊ አገልግሎት የሚሰጥባቸውን ህንጻዎች በሁለት አመት ከስድስት ወራት ማጠናቀቅ የሚያስችል ግብ ተቀምጧል ብለዋል።

በተለያዩ ምክንያቶች ግንባታው የተጓተተውን የወልቂጤ ሆስፒታል ለውጤት ማብቃት እንዲቻል ሚኒስቴር መስሪያ ቤቱን ርዕሰ መስተዳድሩ ትብብር ጠይቀዋል።

የጤና ስርዓትን ከማዘመን አንጻር የበለጸጉ ሶፍት ዌሮች እንደሚያስፈልጉም ርዕሰ መስተዳድሩ ተናግረዋል።

በክልሉ በርካታ ጤና ጣቢያዎች እና ጤና ኬላዎች መገንባታቸውን የገለጹት ርዕሰ መስተዳድሩ የህክምና ቁሳቁስ በማሟላት ረገድ ሚኒስቴር መስሪያ ቤቱ ድጋፍ እንዲያደርግም ጠይቀዋል።

ጠቅላይ ሚኒስትር አብይ አህመድ (ዶ/ር )በአንድ ከተማ አንድ ፕሮጀክት እንዲገነባ ባስቀመጡት አቅጣጫ መሰረት በክልሉ 90 ፕሮጀክቶችን ለማሳካት እየተሰራ መሆኑንም ርዕሰ መስተዳድሩ አብራርተዋል።

ፕሮጀክቶቹ 1ነጥብ 4 ቢሊየን ብር ወጪ የሚጠይቁ ሲሆን ከ2 ነጥብ 7 ሚሊየን ህዝብ ተጠቃሚ እንደሚያደርግም ርዕሰ መስተዳድሩ አመላክተዋል።

የጤና ሚኒስትሯ ዶ/ር መቅደስ ዳባ በበኩላቸው በክልሉ ለተደረገላቸው ደማቅ አቀባበል አመስግነዋል።

ክልሉ በአጭር ጊዜ ተመስርቶ በፍጥነት ወደ ልማት መግባቱን ሚኒስትሯ አድንቀዋል።

የክልለን ዘላቂ ሰላም በማረጋገጥ ረገድ የክልሉ መንግስት የወሰደው ቁርጠኛ አቋም የሚበረታታ ነው ብለዋል።

በጤና ተቋማት ግንባታ፣በማህበረሰብ ጤና መድህን እና በሌሎችም የጤና ልማት ስራ ውጤታማ ተግባራት መከናወናቸውን በአብነት ጠቅሰዋል።

ክቡር ርዕሰ መስተዳድሩን ጨምሮ በየደረጃው ያለው መላው አመራር ለጤና ልማት ስራ በሰጠው ልዩ ትኩረት የላቀ ውጤት ተመዝግቧል ብለዋል።

በወልቂጤ ሆስፒታል ግንባታ ላይ ያጋጠመውን ችግር ለመፍታት ተጨማሪ ውይይት እና ጥናት እንደሚካሔድ አብራርተዋል።

በአንድ ሳምንት ጊዜ ውስጥ ሚኒስቴር መስሪያ ቤቱ ከሚመለከታቸው አካላት ጋር በመነጋገር ችግሩን መፍታት በሚያስችሉ ጉዳዮች ላይ እንደሚሰራም ሚኒስትሯ ጠቁመዋል። ዘገባው የማዕከላዊ ኢትዮጵያ ክልል የመንግስት ኮሙኒኬሽን ቢሮ ነው።

የክልሉ መንግስት በጤናው ዘርፍ የህብረተሰቡን ተጠቃሚነት ለማረጋገጥ እየሰራቸው ያሉ ስራዎች አበረታች ናቸው።

የካቲት 23/2017 ዓ.ም

የክልሉ መንግስት በጤናው ዘርፍ የህብረተሰቡን ተጠቃሚነት ለማረጋገጥ እየሰራቸው ያሉ ስራዎች አበረታች ናቸው። የጤና ሚኒስትር መቅደስ ዳባ ዶ/ር

ሚንስትሯና ልዑካን ቡድናቸው በጉራጌ ዞን በጤናው ዘርፍ እየተከናወኑ ያሉ ስራዎች ምልከታ አድርገዋል።

የኢፌድሪ ጤና ሚኒስትር ዶ/ር መቅደስ ዳባ እንደገለጹት የክልሉ መንግስት በጤናው ዘርፍ የህብረተሰቡን ተጠቃሚነት ለማረጋገጥ እየሰራቸው ያሉ ስራዎች አበረታች ናቸው።

ሚኒስትሯ በወልቂጤ ጤና ጣቢያ የነፍሰ ጡር እናቶች ማቆያ ፣የድህረ ወሊድ፣ የህክምና፣የጤና ኤክስቴንሽን ፕሮግራም እንዲሁም በጤና ጣቢያው በተለያዩ የስራ ክፍሎች እየተሰጠ ያለውን አገልግሎት ምልከታ አድርገዋል።

መንግስት በየደረጃው ህብረተሰቡን የሚያነሳቸው ጥያቄዎችን ምላሽ ለመስጠት በቁርጠኝነት እየሰራ እንደሚገኝ ያነሱት ሚኒስትሯ መስሪያ ቤታቸው ከሚመለከታቸው አካላት ጋር በመስራት በአጭር ጊዜ እንዲጠናቀ ይደረጋልም ብለዋል።

ከዚህም ባለፈ በጉመር ወረዳ የእንጀፎ መሰረታዊ ጤና ኬላ የአገልግሎት አሰጣጥና የሞዴል ቤተሰብ መንደር ምልከታ ያደረጉ ሲሆን በተመለከቱት ነገር መደሰታቸውም አንስተዋል።

ፍትሃዊ የጤና ተቋማት ተደራሽ በማድረግ ጤናው የተጠበቀና አምራች ዜጋ ለማፍራት በዘርፉ ይበልጥ እንደሚሰራም ተናግረዋል።

የጉራጌ ዞን ዋና አስተዳዳሪ አቶ ላጫ ጋሩማ በበኩላቸው የወልቂጤ አጠቃላይ ሆስፒታል በክልሉ መንግስት ግንባታው መጀመሩን አንስተው ይህም ለብዙ ሆስፒታሎች ሞዴል የሚሆን በተለየ ስታንዳርድ እየተገነባ ነው ብለዋል።

ሆስፒታሉ በወቅቱ ተገንብቶ አገልግሎት መስጠት ባለመቻሉ በህብረተሰቡ ዘንድ በየጊዜው ጥያቄ ሲያስነሳ መቆየተን አንስተዋል።

አጠቃላይ ሆስፒታሉ የህዝብና የመንግስት ሀብት ወጪ የተደረገበት ፕሮጀክት መሆኑን ጠቁመው ለዚህም በአጭር ጊዜ ተጠናቆ ለታለመለት አላማ እንዲውል ሁሉም የድርሻውን እንዲወጣም ጠይቀዋል።

የህንጻው ተቋራጭ አቶ ዮሀንስ ሀይሌ የሆስፒታሉ ግንባታ የፊዚካል አፈጻጸሙ 86 ከመቶ መድረሱን አንስተው ይህም በአጭር ጊዜ እንዲጠናቀቅ ትኩረት ሊሰጠው ይገባል ነው ያሉት።

የጉመር ወረዳ ዋና አስተዳዳሪ አቶ ደሳለኝ ከድር መንግስት የህብረተሰቡን ጤና ለማበልጸግ የጤና ኤክስቴንሽን ፕሮግራም ጥራት ለማሻሻልና ቀልጣፋና ውጤታማ የጤና ኤክስቴንሽን አገልግሎት ለመስጠት በዘርፉ የነበሩ ችግሮች ለመፍታት አዲስ የጤና ኤክስቴንሽን ፍኖተ ካርታ በማዘጋጀት ወደ ተግባር ገብቷል።

በወረዳው በዘርፉ አበረታች ስራ መሰራቱንም ጠቁመው የተጀመረው አዲሱ ፍኖተ ካርታ ተግባራዊ ለማድረግ በርካታ ስራዎች እየተሰሩ ይገኛሉ ብለዋል።

በጉመር ወረዳ አግኝተን ያነጋገርናቸው የእንጀፎ ቀበሌ ነዋሪዎች እንዳሉት የቤታቸው ንጽህና በመጠበቃቸው፣ ሽንት ቤት በየቤታቸው በመገንባታቸውና ቆሻሻ በተገቢው በማስወገዳቸው ጤንነታቸው እንደተጠበቀ አንስተዋል።

መሰረታዊ ጤና ኬላው በአቅራቢያቸው በመኖሩ በጤና ኤክስቴንሽን ባለሙያዎች ትምህርት እንደሚሰጣቸውና ይህም ሁሉም እናቶች በጤና ተቋማት እንዲወልዱ አስተዋጽኦ እንዳበረከተላቸው ተናግረዋል።

የጤና ኤክስቴንሽን ባለሙያዎች አስፈላጊውን እገዛ እንዲያደርጉላቸው አመላክተዋል።

በመጨረሻም ለክብርት መቅደስ ዳባ ዶ/ርና ሉዑካን ቡድናቸው ስጦታ ተበርክቶላቸዋል።

ወልቂጤንበጋራእናልማ

ወልቂጤን_በጋራ_እናልማ

==================

የወልቂጤ ከተማ አስተዳደር የኮሪደር ልማት ሀብት አሰባሰብ ቻሌንጅን ተጠናክሮ ቀጥሏል በወልቂጤ ልማት ስራ አሻራውን የማኖር ትዉልድ አይኖርም ‼️

በጉራጌ ዞን የወልቂጤ ከተማ አስተዳደር ከንቲባ ጥሪ በመቀበል የኢትዮጵያ ንግድ ባንክ በኩር ቅርንጫፍ ሰራተኞች የልማት ድጋፍ “ለወልቂጤ ከተማ ኮሪደር ልማት” ሀምሳ ስምንት ሺህ ብር (58,000) የገንዘብ ብር ድጋፍ አድርገዋል።

ቀጣይ በከተማችን ልማት አብሮ በመስራት በምንችለው ሁሉ ለማገዝ ዝግጁ ነን በማለት ገልፀዋል ።

#ለከተማው የልማት ስራ ላይ ላደረጉት ተሳትፎ በወልቂጤ ከተማ አስተዳደር ስም ከልብ እናመሰግናለን 🙏🙏

#ለአርአያነታቸው_እጅግ_አድርገን_እናመሰግናለን❗️

🕊እኔም ለከተማዬ🕊

•~•~••~••~••~••~•

አንተስ…?

አንቺስ…?

ህግን በማስከበር የንግዱ ስርዓት ፍትሃዊ እንዲሆን ከባለድርሻ አካላት ጋር የሚደረገው ቅንጅት የበለጠ ማጠናከር እንደሚገባ ተገለፀ ።

=====ህግን በማስከበር የንግዱ ስርዓት ፍትሃዊ እንዲሆን ከባለድርሻ አካላት ጋር የሚደረገው ቅንጅት የበለጠ ማጠናከር እንደሚገባ ተገለፀ ።

የካቲት 17/2017 ዓም

በጉራጌ ዞን የእዣ ወረዳ የህገ – ወጥ ንግድ ቁጥጥር ግብረ ሀይልና ባለድርሻ አካላት ውይይት አካሂደዋል።

የእዣ ወረዳ የመንግስት ዋና ተጠሪ አቶ ተሾመ ስራኒ በውይይቱ ወቅት እንዳሉት እንደ ወረዳው ብሎም እንደ ሀገር ህገ ወጥ የንግድ እንቅስቃሴ ለመቆጣጠር እና ለመቅረፍ ቅንጅታዊ አሰራር አጠናክሮ ማስቀጠል ይገባል ።

ከነዳጅ አቅርቦትና ስርጭት እንዲሁም በሌሎችም ንግዶች ላይ የዋጋ ጭማሪ አንፃር እየተስተዋሉ ያሉ አዝማሚያዎችን በተገቢው በመፈተሽ ጠንካራ የቁጥጥር ስራ መስራት እንደሚገ ዋና የመንግስት ተጠሪው ጨምረው ተናግረዋል።

እንደ ወረዳው ከፀጥታው ዘርፍ ጋር በተቀናጀ መንገድ በህገ -ወጥ እንቅስቃሴዎች ላይ መደበኛ እና ድንገተኛ የክትትል ስራው ማስቀጠልም እንደሚገባም አቶ ተሾመ ጨምረው ተናግረዋል ።

የእዣ ወረዳ ንግድና ገበያ ልማት ፅ/ቤት ሀላፊ አቶ በለጠ ሳህሌ በበኩላቸው ህግን በማስከበር የንግዱ ስርዓት ፍትሃዊ እንዲሆን ከባለድርሻ አካላት ጋር የሚደረገው ቅንጅት የበለጠ ማጠናከር ይገባልም ብለዋል።

የነዳጅና ኮንትሮባንድ ህገወጥ ተግባራት የሚፈፅሙ ነጋዴዎች ላይ በአዲሱ አዋጅ መሰረት አስተማሪ የሆነ አስተዳደራዊ እርምጃ እንደሚወሰደም ሀላፊው አክለው ተናግረዋል ።

በቀጣይ በተለይም ማደያ በሌለባቸዉ አካባቢዎች የነዳጅ ችርቻሮ ፈቃድ የተሰጣቸዉ ቸርቻሪ ነጋዴዎች የነዳጅ አቅርቦትና ስርጭት ክትትል ማድረግ ላይ በትኩረት ይሰራል ያሉት አቶ በለጠ በሌሎችም ህገ ወጥ የንግድ እንቅስቃሴዎች ለመግታት ግብረ ሀይሉና ባለድርሻ አካላት በቅንጅት መስራት ይገባቸዋልም ብለዋል።

የመድረኩ ተሳታፊዎች በሰጡት አስተያየት እንደ ወረዳው ከህገ ወጥ ንግድ ቁጥጥር ጋር ተያይዞ እየተሰሩ ስራዎች በቀጣይ ይበልጥ ተጠናክረው መቀጠል እንዳለበት ተናግረዋል ሲል የዘገበው የእዣ ወረዳ መንግስት ኮሚኒኬሽን ጉዳዮች ፅ/ቤት ነው።

ብልጽግና ፓርቲ እንደ ሀገር ያቀዳቸው እቅዶችን ውጤታማ እንዲሆኑ ሁሉም የበኩሉን ድርሻ ሊወጣ እንደሚገባ የኢፌዴሪ ከተማና መሠረተ ልማት ሚንስትር ወይዘሮ ጫልቱ ሳኒ አሳሰቡ።

የካቲት 17/2017 ዓ.ም

====================

ብልጽግና ፓርቲ እንደ ሀገር ያቀዳቸው እቅዶችን ውጤታማ እንዲሆኑ ሁሉም የበኩሉን ድርሻ ሊወጣ እንደሚገባ የኢፌዴሪ ከተማና መሠረተ ልማት ሚንስትር ወይዘሮ ጫልቱ ሳኒ አሳሰቡ።

ይህ የገለጹት በጉራጌ ዞን ወልቂጤ ከተማ የተለያዩ የህብረተሰብ ክፍሎች የተሳተፉበት ሀገር አቀፍ የህዝብ ኮንፍረንስ እየተካሄደ ባለበት ወቅት ላይ ነው።

የኢፌዴሪ ከተማና መሠረተ ልማት ሚንስትር ወይዘሮ ጫልቱ ሳኒ እንዳሉት ብሄራዊ ገዢ ትርክት በመገንባት ያሉ ልዩነቶችን ለሀገራዊ አንድነትና ግንባታ መጠቀም ይገባል።

የዴሞክራሲ ስርአት ግንባታ ከመገንባት ባለፈ የኢኮኖሚ አቅም ለመገንባት የተጀማመሩ ሜጋ ፕሮጀክቶችን ለማጠናቀቅ መስራት ይገባል ነው ያሉት።

የህዝቦችን ሰላም ለማረጋገጥ በትኩረት እየተሰራ መሆኑን አንስተው ጠንካራ የጸጥታ አካላት ለመገንባትና የህግ የበላይነት ለማረጋገጥ እንደሚሰራ ገልጸዋል።

እንደ ሀገር ዘላቂ የስራ ዕድል መፍጠር ይገባል ያሉት ሚኒስትሯ 9 ነጥብ 125 ሚሊዮን ዜጎች የስራ ዕድል ለመፍጠር መታቀዱንም አንስተዋል።

እንደ ሀገር የኑሮ ውድነት የሚያረጋጉ ስራዎችን መስራት እንደሚገባ ያነሱት ክብርት ወይዘሮ ጫልቱ ለዚህም ምርትና ምርታማነት ማሳደግ ላይ በትኩረት መስራት እንደሚገባ ጠቁመዋል።

በግብርናው ዘርፍ ከህልውና ወደ ልዕልና ለመሸጋገር ወጣቱ፣ ባለሀብቱና ሌሎችንም በማስተባበር በትኩረት መስራት እንደሚገባ ተናግረዋል።

መንግስት የቱሪዝም ዘርፉ ለማሳደግ ትላልቅ ስራዎችን እየተሰራ መሆኑን አንስተው በቀጣይም ያሉ ሀብቶችን በተገቢው በመጠቀም በዘርፉ ውጤታማ ስራ መስራት ይገባል ብለዋል።

ዲጂታል ኢኮኖሚ መገንባት የመልካም አስተዳደር ችግሮችን ለመፍታትና ቀልጣፋ አገልግሎት ለመስጠት ሚናው የላቀ በመሆኑ በዘርፉ በትኩረት መስራት ይጠበቅብናል ብለዋል።

የከተሞች እድገት ለማፋጠን እንደ ሀገር የኮሪደር ልማት ላይ በትኩረት እየተሰራ መሆኑን አንስተው ይህም በከተማው በፍጥነት ተግባራዊ መደረግ እንዳለበት አውስተዋል።

የኢንዱስትሪ ምርቶችንና የመስኖ አቅም ማሳደግ እንዲሁም የትውልድ እሴት ግንባታ ማጠናከር ላይ በትኩረት እንደሚሰራም ገልጸዋል።

ከዚህም ባለፈ የፍትህ ዘርፉ ውጤታማነት ማረጋገጥ፣ የሲቪል ሰርቪስ ሪፎርም ስራ በትኩረት እንደሚሰራ ተናግረዋል።

እንደ ሀገር ያሉ ፈተናዎችን በጽናት በማለፍ በሁሉም መስኮችን የበለጠ ውጤታማ ስራ ከመስራት ባለፈ ፓርቲው እንደ ሀገር ያቀዳቸው እቅዶችን ተግባራዊ እንዲሆኑ ሁሉም የበኩሉን ድርሻ እንዲወጣ አሳስበዋል። ዘገባው የጉራጌ ዞን የመንግስት ኮሙኒኬሽን ጉዳዮች ፅ/ቤት ነው።

በጉራጌ ዞን እዣ ወረዳ የፖሊዮ በሽታ የመከላከያ ክትባት ዘመቻ በወረዳ አጓይተረህ ቀበሌ በይፋ ተጀምሯል።

=====በጉራጌ ዞን እዣ ወረዳ የፖሊዮ በሽታ የመከላከያ ክትባት ዘመቻ በወረዳ አጓይተረህ ቀበሌ በይፋ ተጀምሯል።

የካቲት 14/2017ዓ.ም

በማስጀመሪያ መርሃ ግብሩ የተገኙት የእዣ ወረዳ ጤና ጥበቃ ፅ/ቤት ሀላፊ አቶ መሀመድ ሰይድ ፡ እንደገለፁት ለአራት ቀናት የሚቆየው የክትባት ዘመቻ በሁሉም የወረዳው ቀበሌዎች እድሚያቸው ከ5 አመት በታች ለሆኑ 16 ሺህ 817 በላይ ህጻናት ክትባቱ የሚሰጥም ይሆናል ።

ሀላፊው አክለውም የልጅነት ልምሻ (ፖሊዮ) በቫይረስ አማካኝነት የሚመጣና በዋናነት የህፃናትን ጤና በመጉዳት እስከሞት የሚያደርስ ሲሆን ክትባቱን በተገቢው መንገድ በመውሰድ በሽታውን መከላከል ያስችላል ።

ይህ ክትባቱ በዘመቻ መልክ ቤት ለቤት የሚከናወን ሲሆን ሕፃናቱ ከአሁን በፊት ክትባቱን ቢከተቡም ባይከተቡም አሁን የሚሰጠው የፖሊዮ ክትባት መውሰድ እንደሚኖርባቸው አቶ መሀመድ ጨምረው ገልፀዋል ።

በዘመቻ መርሃ ግብሩም የወረዳ የፖሊዮ ክትባት ዘመቻ ኮማንድ ፖስት በዳርቻ ጤና ጣቢያ በመገኘት የዘመቻው የስራ እንቅስቃሴ ተመልክቶ ተግባሩ በታቀደው መልኩ እንዲሳካ አቅጣጫ አስቀምጧል ።

በዘመቻ መርሀ ግብሩም የእዣ ወረዳ ጤና ጥበቃ ፅ/ቤት ሀላፊ አቶ መሀመድ ሰይድ ፡ የጉራጌ ዞን ጤና መምሪያ ባለሙያ ወ/ሪት ዘይነባ ጀማል ፡ የእዣ ወረዳ ጤና ጥበቃ ፅ/ ቤት ምክትል ሀላፊ አቶ አመነ ፍቅሬ እንዲሁም የፅ/ቤቱ የዘመቻው አስተባባሪ ባለሙያዎች ተገኝተዋል ሲል የዘገበው የእዣ ወረዳ መንግስት ኮሚኒኬሾን ጉዳዮች ፅ/ቤት ነው ።