ለህብረተሰቡ የተቀላጠፈ የጤና አገልግሎት በመስጠትና አሰራሩን በማዘመን የሆስፒታሉን ደረጃ ከፍ ለማድረግ እንደሚሰራ የቋንጤ የመጀመሪያ ደረጃ ሆስፒታል አስታወቀ፡፡

*======================*

የካቲት 2/2016 ዓ.ም [ቋንጤ]
ለህብረተሰቡ የተቀላጠፈ የጤና አገልግሎት በመስጠትና አሰራሩን በማዘመን የሆስፒታሉን ደረጃ ከፍ ለማድረግ እንደሚሰራ የቋንጤ የመጀመሪያ ደረጃ ሆስፒታል አስታወቀ፡፡
ሆስፒታሉ የ2016 ዓ.ም ሁለተኛ ሩብ ዓመት የማህበረሰብና የቦርድ ውይይትም አካሂዷል፡፡
የቋንጤ የመጀመሪያ ደረጃ ሆስፒታል ተገንብቶ ለህብረተሰቡ አገልግሎት መስጠት ከጀመረ አጭር እድሜ ያስቆጠረ ቢሆንም በፈጣን ለውጥ ውስጥ እያለፈ በመሆኑ በአገልግሎት አሰጣጥም ሆነ የውስጥ አሰራርን አዘምኖ ከመሄድ ጋር ይበል የሚያሰኝ ለውጥ በማስመዝገብ ላይ ያለ ተቋም ነው፡፡
ሆስፒታሉ በትናንትናው እለት ከአራት ቀበሌ ከተውጣጡ የማህበረሰብ ክፍሎች ጋር የወረዳው ዋና አስተዳዳሪ አቶ በህሩ ኸይረዲንና የወረዳው ጤና ጽ/ቤት ምክትል ሀላፊ አቶ አ/ላዚዝ ፋዲል እንዲሁም የሆስፒታሉ ሙሉ ማኔጅመንት በተገኙበት በሆስፒታሉ የውስጥ አሰራርና አገልግሎት አሰጣጡ ዙርያ ጥልቅ ውይይት ተደርጓል፡፡
በእለቱም ከተሳታፊዎች በርካታ ገንቢ የሆኑ ሀሳቦችና በቀጣይ ቢታረሙ ያሉዋቸውን ጉድለቶች ያነሱ ሲሆን የመዳኒት እጥረት፣ የአምቡላንስ ተደራሽነት ችግር፣ የጥቂት ባለሙያዎች የስነ-ምግባር ችግርና የጥርስ ሀኪም ያለመኖር የሚሉ ጥያቄዎችን ሰንዝረዋል፡፡
በዛሬው የቦርድ ስብሰባ ላይ የተገኙት የጉራጌ ዞን ረዳት የመንግስት ተጠሪና የሆስፒታሉ የቦርድ ሰብሳቢ አቶ አለማየሁ ገ/መስቀል እንዳሉት የጤና ተቋማት ከህክምና አገልግሎት አሰጣጥ ባልተናነሰ የተለያዩ አደረጃጀቶችን በተለይም የሴቶች ልማት ህብረት አደረጃጀቶችን በማጠናከር የቅድመ መከላከል ስራዎች ላይ ትኩረት ሰጥተው ሊሰሩ ይገባል ብለዋል፡፡
ሰብሳቢው አክለውም ሆስፒታሉ አሁን ያለበትን ደረጃ በማድነቅ በቀጣይ ራሱን በተለያዩ የህክምና መሳሪያዎችና የሰው ሃይል በማደራጀት እንዲሁም የአገልግሎት አሰጣጡን በማዘመን ደረጃውን ከፍ ለማድረግ መጣር እንዳለበት ጠቁመው በዚህም የዞኑ መንግስት አቅሙ በፈቀደ ለመደገፍ ዝግጁ መሆኑን አረጋግጠዋል፡፡
የጉራጌ ዞን ጤና መምሪያ ሀላፊ አቶ አየለ ፈቀደ በበኩላቸው ሆስፒታሉ አሁን ላይ ያሉበትን በርካታ ችግሮች ተጋፍጦ ለህዝቡ አገልግሎት እየሰጠበት ያለው መንገድ አድንቀው በቀጣይም በስሩ የሚገኙ ጤና ጣቢያዎችንና ጤና ኬላዎችን ደግፎ በማብቃት መጓዝ አለበት ብለዋል፡፡
ሆስፒታሉ በየጊዜው ከህዝብ የሚነሱ ቅሬታዎችን እየፈታ የመጣበት መንገድና አሰራሩን በማዘመን የህብረተሰቡን ርካታ ከመጨመር አንፃር ያመጣው ፈጣን ለውጥ በቀጣይ ደረጃውን ለማሻሻል በምናደርገው ርብርብ ተስፋ ሰጪ ነው ያሉት ደግሞ የወረዳው ዋና አስተዳዳሪና የሆስፒታሉ ምክትል የቦርድ ሰብሳቢ አቶ በህሩ ኸይረዲን ናቸው፡፡
ዋና አስተዳዳሪው አያይዘውም ወረዳው ሆስፒታሉ ከተመሰረተበት ጊዜ አንስቶ ከፍተኛ የሆነ የበጀት ድጋፍ ሲያደርግ እያደረገ እንደሚገኝ ጠቁመው በዘንድሮ አመትም ለነዳጅና መዳኒት ግዢ፣ ለተሽከርካሪና ማሽነሪ ጥገና እንዲሁም ለመዳኒት ክፍል ቁሳቁስ ማሟያ በጥቅሉ ከ2.4 ሚሊየን ብር በላይ በጀት ድጋፍ ማድረጉን አስታውሰው በቀጣይም አጠናክረው እንደሚቀጥሉ ገልፀዋል፡፡
የሆስፒታሉ ስራ አስኪያጅ አቶ ከበደ ግርማ በበኩላቸው ተቋሙ ምንም እንኳን በርካታ ውስጣዊ ችግሮች ቢኖርበትም የገጠሙትን ተግዳሮቶች በመቋቋም በህክምና ዘርፉም ሆነ በስሩ የሚገኙ የጤና ተቋማትን በመደገፉ ረገድ በርካታ ስራዎችን እየሰራ ይገኛል ብለዋል፡፡
በተለይ የእናቶችና ህፃናት ሞት ቅነሳ፣ ተኝቶ ህክምና፣ በሪፈር ለሚመጡ ታማሚዎችና ለድንገተኛ ክፍል ታካሚዎች ልዩ ትኩረት ሰጥቶ እንደሚሰራ አስረድተዋል፡፡
ይሁን እንጂ ተቋሙ ካለበት ከፍተኛ የሆነ የባለሙያዎችና የበጀት እጥረት፣ የህክምና ማሽነሪዎች ብልሽት (ማይክሮስኮፖች፣ ሲቢሲ ማሽን፣ ፍሪጆች፣የአንስቴዥያ ማሽን)፣ የመብራት መቆራረጥ፣ በኢትዮጵያ መዳኒት አቅርቦት ድርጅት (EPSA) የሚፈለጉ መዳኒቶች በብዛት ያለመገኘት ችግሮች ሆስፒታሉን እየተፈታተኑት ያሉ ተግዳሮቶች መሆናቸውን በአፅንኦት ገልፀዋል፡፡
በመጨረሻም የቦርዱ አባላት በህዝብ ውይይትና በቦርዱ ውይይት የተነሱ ችግሮችን በየደረጃው ያለ ባለድርሻ አካል ተቀናጅቶ በመስራት በፍጥነት እንዲቀረፉ አቅጣጫ ማስቀመጡንና የ2016 ዓ.ም የ2ኛ ግማሽ አመት እቅድ ላይ ተወያይቶ ማፅደቁን የዘገበው የወረዳው መ/ኮ/ጉ/ጽ/ቤት ነው፡፡

 

የጉራጌ ብሄረሰብ መገለጫ የሆኑ የጉራጊኛ ቋንቋ : የባህል እሴቶችና ሀገር በቀል እውቀቶችን ለትውልድ እንዲተላለፉ መላው ማህበረሰብ ሀላፊነቱ ሊወጣ እንደሚገባ በጉራጌ ዞን የእዣ ወረዳ ባህልና ቱሪዝም ፅ/ቤት ገለፀ ።

*==============================*

የጉራጌ ብሄረሰብ መገለጫ የሆኑ የጉራጊኛ ቋንቋ : የባህል እሴቶችና ሀገር በቀል እውቀቶችን ለትውልድ እንዲተላለፉ መላው ማህበረሰብ ሀላፊነቱ ሊወጣ እንደሚገባ በጉራጌ ዞን የእዣ ወረዳ ባህልና ቱሪዝም ፅ/ቤት ገለፀ ።
ፅ/ቤቱ በቱሪስት አገልግሎት ሰጪ ተቋማት እና በጉራጌ ብሄረሰብ ባህል ፡ ቋንቋና ሌሎችም እሴቶች ማጠናከር ላይ ትኩረት ያደረገ ለባለድርሻ አካላት ሰጥቷል ።
በእለቱም የእዣ ወረዳ አስተዳደር ፅ/ቤት ሀላፊ አቶ ይርጋለም ብዛ እንደገለፁት አንድ ቋንቋ ወይንም ባህል ሊያድግና ለቀጣይ ትውልድ ሊሸጋገር የሚችለው የዚህ ማህበረሰብ ውስጥ የሚገኝ የህብረተሰብ ክፍል በተለያዩ ማህበራዊ ጉዳዮች ወቅት ቋንቋውን ወይንም ባህሉን እራሱ ተናግሮ ለሌሌች ማስተዋወቅ ሲችል ነው ።
ለዚህም ስኬታማነት በዚህ ስልጠና የተሳተፉት ታዋቂ ሽማግሌዎች ፡ ተጠሪ መምህራንና ርዕሰ መምህራን የጉራጌ ብሄረሰብ መገለጫ የሆኑትን አኩሪ እሴቶች እንዲተዋወቁና ለትውልድ ተሻጋሪ እንዲሆኑ የድርሻቸው መወጣት እንዳለባቸውም አቶ ይርጋለም አስገንዝበዋል ።
ሌላው በወረዳችን ብሎም በሀገራችን ተስፋፍቶ የሚገኘው ድህነትና ስራአጥነት ለማስወገድ ከሚቻልባቸው ዋና ዋና መንገዶች አንዱ የሆነው የቱሪዝም ኢንዱስትሪ ልማት እንዲስፋፋ ማድረግ ተጠቃሽ ነው ያሉት አቶ ይርጋለም ህብረተሰቡ ከዚህ ዘርፍ ከኢኮኖሚ ተጠቃሚ እንዲሆን ማድረግ የሚቻለው ለቱሪስቱ ደረጃቸው የጠበቁ የመስተንግዶ አገልግሎት ሰጪ ተቋማት ባለቤቶች ሀላፊነት መወጣት እንደሚኖርባቸውም መልዕክት አስተላልፈዋል ።
የእዣ ወረዳ ባህል ቱሪዝም ፅ/ቤት ሀላፊ ወ/ሮ የሺተካ እንደገለፁት የጉራጊኛ ቋንቋ ብሎም ሌሎች እሴቶቻችን በትውልዱ የተሻለ ደረጃ ለጥቅም እንዲውሉ ከፍተኛ ሚና መጫወት ከሚችሉ ተቋማት አንዱ ትምህርት ቤቶች ተጠቃሾች መሆናቸው ገልፀው ለዚህም ክበባቶች በማጠናከርና የጉራጊኛ የቋንቋ ቀን በየሳምንቱ በማወጅ ተማሪዎች በዚህ ቋንቋ ብቻ የሚግባቡት ሂደቱ ተጠናክሮ መቀጠል አለበት ።
እነዚህ የብሄረሰቡ መገለጫ የሆኑት የባህል እሴቶችና ሀገር በቀል እውቀቶች ተጠቅሞ ለትውልድ እንዲተላለፉ ሁሉም ሀላፊነቱ መወጣት እንደሚገባ የገለፁት ወ/ሮ የሺ በተለይም ቀድሞ ማህበረሰቡ ሲጠቀምባቸው የቆዩ ውብና ቀልብ ሳቢ የነበሩትን የሰርግ ስነ-ስርዓት ፡ የቤት አሰራር ፡ የጀፎሮ አጠባበቅ ፡ ባህላዊ የዳኝነት ስነ-ስርዓትና ሀገር በቀል እውቀቶችን በመጠበቅና ለትውልድ እንዲተላወፉ ሁሉም የድርሻው ሊወጣ ይገባልም ብለዋል ።
ከዚህ በተጨማሪ እንደ ወረዳው የሚገኙ አገልግሎት ሰጪ ተቋማት ከሚመለከታቸው ባለድርሻ አካላት ጋር የጥራት ደረጃቸውና የአገልግሎት አሰጣጣቸው ለማሻሻል የድጋፍና ክትትል ስራ እየተሰራ ያለው ስራ ተጠናክሮ እንደሚቀጥልም ወ/የሺ ተካ ገልፀዋል ።
በፅ/ቤቱ የቱ/አ/ሰ/ተ/ ዋና ስራ ሂደት አስተባባሪ የሆኑት አቶ አብረሃም መላኩ የስልጠናው ሰነድ ያቀረቡ ሲሆን የጉራጌ ብሄረሰብ መገለጫ የሆኑትን የተለያዩ አኩሪ እሴቶች እንዲተዋወቁ እንዲጠቅሙና ከትውልድ ወደ ትውልድ እዲሸጋገሩ ፅ/ቤቱ የድርሻውን እየተወጣ ቢሆንም አሁን ከዞን ጀምሮ በተደራጀና በተጠናከረ መልኩ የብሄረሰቡ እሴቶች ወደሚፈለጉበት ደረጃ እንዲደርሱ ከማድረግ አንፃር ቀሪ ስራዎች ይጠይቃል ብለዋል ።
የቱሪስት አገልግሎት ሰጪ ተቋማት ማሟላት ከሚገባቸው ጉዳዮች መካከል የህንፃው ስነ-ውበት ማራኪና ሳቢ መሆኑን ፡ የተሟላ የንፅህናና የመፀዳጃ ቤቶች እንዲኖር ማድረግ ፡ የሰራተኛች አለባበስና ሥነ ምግባር እንዲኖራቸው ማድረግ የመግቢያ ቦታዎች ምቹና ንፅህናቸው የጠበቁ መሆን እንዳለባቸውንና የመሳሰሉት ተጠቃሾች መሆናቸውንም በሰነዱ አመላክተዋል ።
ተሳታፊዎቹም በሰጡት አስተያየትም ፅ/ቤቱ እነዚህን እሴቶች እንዲጠናከሩ እያደረገውን ያለው ስራ ከሚመለከታቸው አካላት ጋር አጠናክሮ መቀጠል እንዳለበትና የቱሪስት አገልግሎት ሰጪ ተቋማት የአገልግሎ አሰጣጥ ደረጃው ለማሻሻል ከስልጠናው ብዙ ግንዛቤ ያገኙ በመሆኑ በቀጣይ የድርሻቸውን እንደሚወጡም ተናግረዋል።
በስልጠናው መጨረሻም ግንባር ቀደም የቱሪስት አገልግሎት ሰጪ ተቋማት የማበረታቻ ሰርተፊኬት ተሰጥቷቸዋል ሲል የዘገበው የወረዳው መንግስት ኮሚኒኬሽን ጉዳዮች ፅ/ቤት ነው።

በጉራጌ ዞን የእዣ ወረዳ ምክርቤት የላቀ አፈፃፀም ላስመዘገቡ የቀበሌ ምክር ቤቶች ፡ ስራስኪያጆችና የተቋሙ ግንባር ቀደም ባለሙያዎች የማበረታቻ ሽልማት አበረከተ።

=====================

ህዳር 25/2016 ዓም
በጉራጌ ዞን የእዣ ወረዳ ምክርቤት የላቀ አፈፃፀም ላስመዘገቡ የቀበሌ ምክር ቤቶች ፡ ስራስኪያጆችና የተቋሙ ግንባር ቀደም ባለሙያዎች የማበረታቻ ሽልማት አበረከተ።
ም/ቤቱ የ2016 ዓም 1ኛ ሩብ ዓመት 4ኛ ዙር 10ኛ ዓመት 34ኛ የቀበሌዎች ም/ቤቶች የጋራ የምክክር መድረክ/ፎረም / በዛሬው እለት አካሂዷል ።
የእዣ ወረዳ ም/ቤት ዋና አፈ ጉባኤ አቶ ሙከረም በደዊ በመክፈቻ ንግግራቸው በየደረጃው የሚገኙ ምክር ቤቶች የክትትልና ቁጥጥር አቅማቸው በማሳደግ የማህበረሰቡ ተጠቃሚነት በሚያረጋግጡ ጉዳዮች ላይ መስራት ይገባቸዋል ብለዋል ።
በቀበሌ ደረጃ አስፈፃሚ ሴክተሮች ስራቸው በምክር ቤት እያስገመገመ ያለበት አግባብ እና የመልካም አስተዳደር ችግሮች እየተቀአፉ የመጡበት አግባብ መጠናከር እንደሚገባውውም አፈ ጉባኤው ጨምረው ገልፀዋል ።
አሁንም በትኩረት መሰራት የሚገባቸው የቀበሌ ምክር ቤት ቋሚ ኮሚቴዎች የክትትልና ቁጥጥር ተግባር ስራ የሚጠይቅ መሆኑን ፡ የምክር ቤት ጉባኤ የሚያቆራርጡ ቀበሌዎች መኖራቸውና ሌሎች ትኩረት መሰጠቶ ያለባቸው ስራዎች በማረም የቀበሌ ምክር ቤቶች የህዝብ ውክልናቸው ማረጋገጥ እንደሚገባቸውም አቶ ሙከረም ጨምረው አስገንዝበዋል።
የቀበሌ ምክር ቤት ተግባራት የባለድርሻ አካላት ሚና ከፍተኛ እንደመሆኑ መጠን ከባለድርሻ አካላት ጋር በቅንጅት ሊሰሩ እንደሚገባ የተናገሩት አቶ ሙከረም ህዝቡን የጣለባቸዉን አደራ ለመወጣት የሚያጋጥማቸዉ ችግሮችን በመለየት በቀበሌዉ ለሚፈለጉ ልማቶች አፋጣኝ ምላሽ እንዲያገኙ ማድረግ እንዳለባቸዉ መልዕክት አስተላልፈዋል።
ምክር ቤቱ ባለሙያ አቶ ተስፋዬ ካሳ የተለያዩ ሰነዶች ባቀረቡበት ወቅት እንደዚህ አይነት የምክክር መድረኮች በቀበሌ ደረጃ የሚገኙ ምክር ቤቶች ካላባቸው ጉድለት በማላቀቅና ልምድ በመቅሰም ለወከላቸው ማህበረሰብ በተገቢው ለማገልገልና በቁርጠኝነት ለመስራት እንደሚያስችል እንደሆነም አመላክተዋል ።
ም/ቤቶች የህዝብ ጥቅምን ለማስጠበቅ ዋና አላማ በማድረግ የተመሰረቱ መሆናቸዉን ጨምረው የገለፁቶ አቶ ተስፋዬ ይህንኑ በመገንዘብ ድጋፍና ክትትል በማድረግ ፣የሚጋጥማቸዉን ችግሮችን በመለየት፣ጉባኤዎችን በወቅቱ በማከናወን፣ በየቀበሌው ህዝቡ የሚፈልገዉን ልማት የሚያገኝበት መንገዶች በመዘርጋት ከሚመለከታቸው አካላት ጋር በቅንጅት ሊሰሩበት እንደሚገባም አመላክተዋል ።
ም/ቤቱ የላቀ አፈፃፀም ላስመዘገቡ የቀበሌ ምክር ቤቶች ፡ ስራስኪያጆችና የተቋሙ ግንባርቀደም ባለሙያዎች የማበረታቻ ሽልማት አበርክቷል ሲል የዘገበው የእዣ ወረዳ መንግስት ኮሚኒኬሽን ጉዳዮች ፅ/ቤት ነው ።

በጉራጌ ዞን እዣ ወረዳ በቆጠር ገድራና አካባቢው የሚገኙ ተወላጅ ባለሀብቶችና ማህበረሰቡ በትምህርቱ ዘርፍ እያደረጉት ያለው ተሳትፎ ለሌሎችም አካባቢዎች መነሳሳትን እየፈጠረ ይገኛል ።

=======================

በጉራጌ ዞን እዣ ወረዳ በቆጠር ገድራና አካባቢው የሚገኙ ተወላጅ ባለሀብቶችና ማህበረሰቡ በትምህርቱ ዘርፍ እያደረጉት ያለው ተሳትፎ ለሌሎችም አካባቢዎች መነሳሳትን እየፈጠረ ይገኛል ።
የአካባቢው ተወላጅ ባለሀብቶች ፡ በውጭና በሀገር ውስጥ የሚገኙ የቀድሞ ተማሪዎችና ማህበረሰቡ በቆጠር ገድራ 2ኛ ደረጃ ት/ት ፡ የሻመነ 1ኛ ደረጃ ትምህርት ቤት እና የቆጠር 1ኛ ደረጃ ትምህርት ቤቶች ላይ በርካታ ስራዎች እያከናወኑ መሆኑን በአካል መመልከት ይቻላል ።
በ3ቱም ትምህርት ቤቶች ከ20ሚሊየን ብር በላይ በጀት በመመደብ ተጨማሪ የመማሪያ ግንባታዎች ፡ የመምህራን መኖሪያ ቤቶች ግንባት ፡ የመማሪያ ክፍሎች እድሳት ፡ ውብና ማራኪ የሆኑ መግቢያ በር ግንባታ የላይበረሪ እና ሌሎችም ለትምህርት አስፈላጊ የሆኑ ግብዓቶች እንዲሟሉ በማድረግ ለተማሪዎች ምቹ የትምህርት አካባቢ እንዲፈጠርላቸው አድርገዋል።
የአካባቢው ተወላጆች ለረጅም አመታት የተለያዩ የልማት ስራዎች በተደራጀ መንገድ ከወረዳው መንግስት ጋር በመናበብ የሚያደርጉት እንቅስቃሴ ለሌሎችም አካባቢዎች መነቃቃት በመፍጠር እንደ ወረዳው አሻራቸው እየጣሉም ይገኛሉ ።
እዣ ወረዳ እነደዚህ አይነት የልማት ተሳትፎ የሚደርጉ ትውልዶች በአሁን ሰዓት በሰፊው በመንቀሳቀስ በቅርቡ ምናውቀው እንደ ” ጋበር ” ያለ ለህዝብና ለነገ ትውልድ አሳቢ ድርጅት ተቋቁሞ በአጭር ጊዜ ታምር የሚመስሉ ስራዎች እየተሰሩ መሆኑን እጅግ ይበል የሚያሰኝ ነው ።
የእዣ ወረዳ አስተዳደር እነዚህን አካላት መጥተው አካባቢያቸው እንዲደግፉ በማወያየትም ይሁን ተቀራርቦ በመነጋገር እና ለሚቸግራቸው ጉዳዮች የመፍትሄ አካል እንዲሆን እያደረገላቸው ያለው ትብብር ይበልጥ ለማህበረሰባቸው እንዲያስቡ መነሳሳት እንደፈጠረላቸውም ተወላጅ ባለሀብቶቹ በተለያየ ወቅት በሚኖሩ መድረኮች ላይ በአስተያየት ሲገልፁ መረዳት ይቻላል።
በአጠቃላይ ከተቀናጁ ፡ ከተወያዩ ፡ በጋራ ጉዳዮች ላይ መግባባቶች ከተፈጡሩ ማህበረሰቡ በቀላሉ ከድህነት ከማውጣት በተጨማሪ ነገን አካባቢው ሚለውጥ ፡ ሀገርን ሚያሳድግ ትውልድ ጭምር ማፍራት ይቻላልና በቆጠርገድራ ቀበሌና አካባቢው የሚገኙ ተወላጅ ባለሀብቶች ፡ የቀድሞ ተማሪዎችና መላው ማህበረሰቡ የልማት ተሳትፎ በሁሉም የወረዳችንና ከተማ አስተዳደሩ አካባቢዎች በማሳፋፋት ታሪክ እንስራ መልዕክታችን ነው ። መረጃው የእዣ ወረዳ መንግስት ኮሚኒኬሽን ጉዳዮች ፅ/ቤት ነው ።

የሸዋል ኢድ በዓል በዓለም ቅርስነት ተመዘገበ‼️

የሸዋል ኢድ በዓል በዓለም ቅርስነት ተመዘገበ‼️

የሸዋል ኢድ በዓል አከባበር በተባበሩት መንግስታት የትምህርት፣ የሳይንስና ባህል ተቋም (ዩኔስኮ) በማይዳሰስ ቅርስነት ተመዝግቧል።

በዚህም የሸዋል ኢድ በዓል ሀገራችን በማይዳሰስ ቅርስነት በዩኔስኮ የተመዘገበ 5ኛ ቅርስ ያደርገዋል።

ኢትዮጵያ ካሏት ደማቅ ማህበራዊ እሴቶች ውስጥ አንዱ የሸዋል ኢድ በዓል አከባበር የአለም ቅርስ ሆኖ መመዝገቡ የቱሪስት ፍሰቱ እንዲጨምር ከማድረጉም ባለፈ የሀገር መልካም ገፅታ በመገንባት ረገድ ፋይዳው የላቀ መሆኑን የሐረሪ ክልል ኮሙኒኬሽን መረጃ አመላክቷል።

የሸዋል ኢድ በዓለም ቅርስነት መመዝገቡ የክልሉን የቱሪዝም ማዕከልነት የሚያሳድገው ከመሆኑ ተጨማሪ የህዝብን ተጠቃሚነት ከማሳደግ አንፃር ጉልህ አስተዋጽኦ እንደሚኖረው ተጠቁሟል።

#በውብ_እጆች_የተሰሩ_የዕደ_ጥበብ_ውጤቶች

===================================================================

#በውብ_እጆች_የተሰሩ_የዕደ_ጥበብ_ውጤቶች
➳➳➳➳➳➳➳➳➳➳➳➳➳➳➳➳➳
የጉራጌ ማህበረሰብ የሠው ልጅ ተፈጥሮን ለእርሱ በሚመቸው አይነት መልኩ መግራት ከጀመረበት ዘመን አንስቶ ተፈጥሮ የቸረችውን ከአካባቢው የሚገኙ ግብዓቶችን በመጠቀም ለየዕለት ህይወቱ አስፈላጊ የሆኑትን ቁሶች ከማምረት ባሻገር ለረዥም ጊዜ አገልግሎት ሊሰጡ የሚችሉ መገልገያዎችን ጭምር በመስራት ዕውቀቱን ለትውልድ አሸጋግሯል፡፡ እያሸጋገረም ይገኛል፡፡
ከእነዚህ የጉራጌ መለያ ናቸው የሚባሉት የዕደ-ጥበብ ውጤቶች መካከል ጥቂቶቹን ለአብነት እንኳ ብንጠቅስ እንደ የብረት፣ የሸክላ፣ የእንጨት፣ የቀንድ፣ የሽመና፣ የቆዳ፣ የቃጫ፣ የስንደዶ እና የቄጠማ ስራዎች እናገኛለን፡፡
የማኅበረሰቡ ዕውቀትና ክህሎት አሻራ በእነዚህ የዕደ-ጥበብ ዘርፎች አርፎባቸዋል፡፡ ዛሬ ዛሬ በጉራጌ ዞን በሚገኙት አንዳንድ ወረዳዎች ከስንደዶ፣ ከአክርማ፣ ከቃጫና ክር የሚመረቱ የዕደ-ጥበብ ውጤቶች ከአካባቢውና ከአገር አልፈው ከባህር ማዶም ባሉት ገበያዎች ላይ ተፈላጊነታቸው እየጨመረ መጥቷል፡፡
ከነዚህ ውብ የእደ ጥበብ ውጤቶች መካከል ጥቂቶቹ፡-
1. #ይወደረ
በእንሰት አብቃይነቱ የሚታወቀው የጉራጌ ብሔር እንሰትን ከምግብነት በተጨማሪ ለተለያዩ ግልጋሎቶች ይጠቀሙበታል፡፡ ከነዚህም ለምግብ ማዘጋጃነትና ማቅረቢያነት፣ ለመኝታና ለቤት ውስጥ ንጣፍነት ተጠቃሽ ናቸው፡፡ ይወደረ ለምግብ ማቅረቢያነት የሚያገለግል ሲሆን የሚሰራውም የእንሰት ውጤት በሆነው በቃጫ ነው፡፡ ይህም ውበት እንዲኖረው በተለያየ ቀለማት ይነከራል፡፡ አንድ ጥሩ የተባለ ይወደረ ሰርቶ ለማውጣት እስከ አንድ ወር ጊዜ
የሚፈጅ ሲሆን እንዲህ አይነቱ ይወደረ ቁመቱ ሁለት ሜትር፣ ጎኑ[ስፋቱ] ደግሞ አንድ ሜትር ያህል ይሆናል፡፡
ይወደረ በተለይ ትላልቅ ክብረ-በዓላትና ትላልቅ ዝግጅቶች ሲኖሩ ቤት ውስጥ ወለል ላይ በተነጠፈ ሰፊና ምርጥ ጅፐ [ጅባ] ላይ ይዘረጋና ቆጮ፣ ክትፎ፣ አይብና የጎመን ክትፎ በጣባ ወይም በጥለስ [ከእንሰት ቅጠል የተሰራ ለመመገቢያነት የሚያገለግል] እንዲበላበት ለታዳሚው ይዘረጋል፡፡ በተለይ በመስቀል ወይም በአረፋ ክብረ በአላት ጊዜ ይወደረ እንዳይቆሽሽ ተጠቅልሎ በንጽህና ከተቀመጠበት ቦታ ይወጣና እስከ በዓላቱ ፍፃሜ ድረስ
ጅፐ ላይ ተዘርግቶ ማዕድ ማቅረቢያ ሆኖ ሲያገለግል ይቆያል፡፡
2. #ጅፐ [ጅባ]
ሌላው ከእንሰት ተክል እና ከቄጠማ የሚሰራው የዕደ-ጥበብ ውጤት ጅፐ [ጅባ] ይባላል፡፡
ይህ የዕደ-ጥበብ ውጤት ከእንሰት ተክል ከሚገኘው ቃጫና ኮባ የሚሰራ ሲሆን ለቤት ውስጥ ወለል ንጣፍነትና ለመኝታ አገልግሎት ይውላል፡፡
የተለያየ መጠንና ጥራት ያላቸው የጅፐ አይነቶች ሲኖሩ በጣም ምርጥ የተባሉት ልክ እንደ ይወደረ ለተለያዩ ክብረ-በዓላትና ለትላልቅ ዝግጅቶች ብቻ ግልጋሎት
የሚሰጡ ናቸው፡፡
መሃከለኛ የሆኑት ደግሞ ዘወትር ተነጥፈው በህዝቡ የዕለት ተዕለት ህይወት ውስጥ ጥቅም ላይ ይውላሉ፡፡
3. #ሰፍ [መሶብ]
ሰፍ [መሶብ] ከስንደዶና ከአክርማ የሚሰራ ሲሆን በጉራጌ ብሔረሰብ ዘንድ የተለያየ ቅርፅና መጠን ያላቸው ሰፍ [መሶብ] እየተሰሩ ለተለያዩ የማዕድ አገልግሎቶች ሲውሉ ይስተዋላሉ፡፡
እነዚህ በልዩ ልዩ ህብረ-ቀለማት ያጌጡ ውብና ማራኪ የዕደ-ጥበብ ውጤቶች ከቡና ቁርስ ማቅረቢያነት እስከ እንጀራና ዳቦ ማስቀመጫነት ሲያገለግሉ ትላልቅ
ሆቴሎችና ሬስቶራንቶችም በዋናነት ይጠቀሙባቸዋል፡፡
ልዩ ልዩ የሸክላ ምርቶች በጉራጌ እጅግ መጠነ ሰፊ ግልጋሎት የሚሰጡ የሸክላ ስራ ውጤቶች ይሰራሉ፡፡
እነዚህ የዕደ-ጥበብ ውጤቶች ለምግብ ማብሰያነትና ማቅረቢያነት፣ ለመጠጫነት፣ እንዲሁም የሚበሉና የሚጠጡ ምግቦችና መጠጦችን ሳይበላሹ ለረዥም ጊዜ ማቆያነት [ማስቀመጫነት] የሚጠቀሙበት ሲሆን አንዳንዶቹም
ከአንድ በላይ ለሆነ ጠቀሜታ ይውላሉ፡፡
እንደ ጀበና፣ የክትፎ አይብ ማቅረቢያና ማዋሃጃ ጣባ፣ ቅቤ ወይም ማር ወይም ወተት ማስቀመጫ፣ ጥዋ፣ የሸክላ ድስት፣ እንስራና ጋን ታዋቂ የብሔሩ የዕደ-
ጥበብ ውጤቶች ናቸው፡፡
4. #አንቀፎ [ማንኪያ]
ጉራጌ ከከብት ቀንድ የተለያዩ የቤት ቁሳቁሶችን ይሰራል፡፡ ከነዚህም ውስጥ አንዱና ዋንኛው አንቀፎ [ማንኪያ] ነው፡፡
አንቀፎ የተለያየ መጠን ያለው ሲሆን አነስተኛው ለክትፎ፣ ለአይብ፣ ለዝማሙጃት፣ ለኸቋት፣ ለፍንታፍንቶ፣ ለኦዛት፣ ለድኩቸ እና ለማር ወለላ መመገቢያነት ሲያገለግል ትልቁ ደግሞ በትልቅ ጣባት ክትፎ፣ አይብ፣ ዝማሙጃት እና የጎመን ክትፎ ከቅቤና ሚጥሚጣ ጋር ለመለወስና ለማቀላቀል
ይጠቀሙበታል።

Visit Gurage

የጨረታ ማስታወቂያ!!

====================================

ለጥቃቅንና አነስተኛ ኢንተርፕራይዞች ብቻ የወጣ የጨረታ ማስታወቂያ!!
የእዣ ወረዳ ፋይናንስ ፅ/ቤት ለእዣ ወረዳ ትራንስፖርትና መንገድ ልማት ፅ/ቤት በተለያዩ ቀበሌዎች የመንገድ ስራ በጨረታ አወዳድሮ ማሰራት ይፈልጋል።
ዝርዝሩን ይመልከቱ !!

ገጣሚ ና መምህር ክፍሌ ተመስገን

=====================

ገጣሚ ና መምህር ክፍሌ ተመስገን
ጦቢያ ላይ ባልተለመደ መልኩ “ኬረዢ” የሚል ጉራግኛ ግጥም በማቅረብ እጅግ ከፍ ያለ አድናቆትን አትርፏል
# “ቡርሳዊ” በሚል ድንቅ ትረካም ይታወቃል
#በተጨማሪም እልል በር ጉራጌ የግጥም መድብል በቪሲዲ
#መርኸቱ መጽሐፍ
#ቅን የደፍ ግየ በቪሲዲ ከሰራቸው ስራዎች ጥቂቶቹ ናቸው።
ክፍሌ በባህሪም እጅግ ጥሩ ስብእናም ያለው ወንድማችን ነው
በቅርቡም “ኬረዢ”የሚል አዲስ መፅሀፍ ለአንባቢያን ለማቅረብ በእንቅስቃሴ ላይ ነው
ሶሬሳ ወንድማችንን በርታ እንበለው

“ጋበር ” የበጎ አድራጎት ማህበር በዚህ ዓመት ወደ ዩኒቨርሲቲ ለሚገቡ ተማሪዎች ለያንዳንዳቸው ከ15 ሺህ ብር ጀምሮ በየደረጃው የገንዘብ ድጋፍ አደረገ ።

==================================

“ጋበር ” የበጎ አድራጎት ማህበር በዚህ ዓመት ወደ ዩኒቨርሲቲ ለሚገቡ ተማሪዎች ለያንዳንዳቸው ከ15 ሺህ ብር ጀምሮ በየደረጃው የገንዘብ ድጋፍ አደረገ ።

ማህበሩ በ2016 ዓም ዩኒቨርስቲ በቀጥታ ለሚገቡ 28 ተማሪዎች ለእያንዳንዳቸው ከ15ሺህ እስከ 10 ሺህ እንዲሁም በሪሚዲያል ዩኒቨርስቲ ለሚገቡ 116 ተማሪዎች ለእያንዳንዳቸው 3ሺህ ብር የገንዘብ ድጋፍ አድርጓል ።

ማህበሩ በዛሬው እለት ከእዣ ወረዳ አስተዳደር ጋር በመተባበር የ12ኛ ክፍል ሀገር አቀፍ ፈተና የወሰዱ ተማሪዎች የዕውቀትና የግንዛቤ ማስጨበጫ መድረክ አካሂዷል ።

የጉራጌ ዞን ትምህርት መምሪያ ሀላፊ አቶ መብራቴ ወ/ማርያም እንደገለፁት ጋበር በጎ አድራጎት ማህበር እያከናውናቸው ያሉት ተግባራቶች እንደ እዣ ወረዳ ብሎም እንደ ጉራጌ ዞን የትምህርት ውጤት ስብራትን ለማካካስ ትልቅ አቅም የሚፈጥር በእውቀቱ የዳበረ የነገ ሀገር ተረካቢ ዜጋ ለማፍራት የሚያስችል አርዕያ ያለው ተግባር ነው ።

ማህበሩ ከሁሉም በላይ ለየት የሚያደርገው የማህበረሰቡ አስተሳሰብ ለመቀየር የጀመረው ተግባር ነው ያሉት ሀላፊው ከአርሶአደር ጀምሮ የተለያዩ ባለድርሻ አካላት በማወያየት በትምህርት በጤና ፡ በግብርናና በሌሎችም ዘርፎች እንዴት መለወጥ እንደሚቻልና ውጤት ማስመዝገብ እንደሚገባ ተሞክሮዎችንም ጭምር በተግባር በማሳየት የጀመረው ስራ የሚበረታታ ነውም ብለዋል።

ከብዙ ልማቶች ሁሉ ልማት የሚባለው የሰው ልጅ አእምሮ ማልማት መሆኑን ማህበሩ በጥልቀት ተገንዝቦአል ያሉት አቶ መብራቴ በተለይም የተማሪዎች ውጤት ለማሳደግ መፅሀፍቶችን ከመግዛትና ሌሎች በዘርፉ ያሉት ማነቆዎች ለመፍታት እያደረገው ያለው ከፍተኛ እንቅስቃሴ እንደ ዞኑ እውቅና የሚሰጠውና ተሞክሮ የሚሆንም ጭምር በመሆኑ ምስጋና ይገባቸዋልም ብለዋል።

የእዣ ወረዳ ዋና አስተዳዳሪ አቶ ዘውዱ ዱላ በዚህም እንዳሉት ባለፉት ዓመታት በሀገራችን ብሎም በወረዳችን የትምህርት ሽፋን ላይ በስፋት ቢሰራም የጥራቱ ጉዳይ በሽፋኑ ልክ ትኩረት ተሰጥቶት ባለመሄዱ ከፍተኛ የሆነ የትምህርት ውጤት ስብራት አጋጥሞናል ብለዋል።

በመሆኑም ወረዳችን የዚህ ተፅኖ ተጋሪ ሆኗል ያሉት ዋና አስተዳዳሪው ለዚህም ማሳያ በ2015 ዓም ፈተና ከወሰዱት 448 ተማሪዎች መካከል 28ቶቹ ወደ ዩኒቨርስቲ በቀጥታ የሚገቡ ሲሆን 116 ተማሪዎች ደግሞ የማስተካከያ ትምህርት የሚወስዱ መሆኑንኑንና ሌሎች 330 ወደ ቴክኒክና ሙያ የሚገቡ ናቸው ብለዋል።

የገጠመንን የውጤት ስብራትና የትምህርት ቤት መሰረተ ልማት ጉለት ለሟሟላት በተለይም ጋበር የበጎ አድራጎት ማህበር እያደረገው ያለው ከፍተኛ የሆነ ሁለንተናዊ ድጋፍ በወረዳው ስም ምስጋናቸውን አቅርበዋል ።

የእዣ ወዳ ም/አስተዳዳሪና የትምህርት ፅ/ቤት ሀላፊ አቶ ተጠምቀ በርጋ በበኩላቸው በሀገሪቱ ኢኮኖሚያዊ ፡ ማህበራዊ ፡ ፖለቲካዊ እንቅስቃሴዎች ውስጥ የነቃ ተሳትፎ የሚያደርግ በስነ ምግባሩ የታነፀ የነገ ሀገር ተረካቢ ዜጋ እንዲሆን በርካታ ቀሪ ስራዎች መስራት እንዳለብን አመላካች ነው ብለዋል።

ሀላፊው አክለውም ኩረጃን የሚጠየፍ በራሱ የሚተማመን ዜጋ ከማፍራት አኳያ ሰፋፊ ጉለቶች መኖራቸውን በ2014 እና በ2015 የተሰጠው ሀገር አቀፍ የ12ኛ ክፍል ፈተና ጉልህ ማሳያ ነው ።

እንደ ወረዳው ወደ ዩኒቨርስቲ የሚገቡ ተማሪዎች እና ወደ ቴክኒክና ሙያ ገብተው በአጭር ግዜ እራሳቸውና ሀገራቸው ለመጥቀም ሰፊ እድል ያላቸው ተማሪዎች መልካም ቀሪ ጊዜ እመኛለሁ ያሉት አቶ ተጠምቀ በቀጣይ የትምህርት ባለድርሻ አካላትም በትምህርት ዘርፉ ያሉት ማነቆዎች በቁርጠኝነትና በባለቤትነት በመስራት የተሻለ ውጤት እንዲመጣ ርብርብ ማድረግ ያስፈልጋልም ብለዋል።

የጋበር በጎ አድራጎት ድርጅት የቦርድ ሰብሳቢ አቶ ኮሬ ባዌ በበኩላቸው ድርጅቱ በዋናነት አላማ አድርጎ የተቋቋመው በእዣ ወረዳ ያሉ ኢኮኖሚያዊና ማህበራዊ ችግሮችን መንግስት ለመፍታት በሚያደርገው ጥረት የአካባቢው ህብረተሰብ በማስተባበር የበኩሉን አስተዋጽኦ ማበርከት እንዲችል ነው ብለዋል።

በተለይም ድርጅቱ በትምህርት ዘርፍ ላይ መሰረታዊ ለውጥ ለማምጣት መጽሀፍ ገዝቶ ድጋፍ ከማድረጉም በተጨማሪ በዚህ ዙር በ2015 ዓም ሀገር አቀፍ ፈተና ውስደው ወደ ዩኒቨርስቲ የሚገቡና በተለያየ መልኩ የማበረታቻ ሽልማት ያዘጋጀ ሲሆን ቀሪዎች ወደ ቴክኒክና ሙያ ኮሌጅ ገብተው እንዲማሩ የማስገንዘብ ስራ ለመስራት ነው ብለዋል።

ማህበሩ በ2016 ዓም ዩኒቨርስቲ በቀጥታ ለሚገቡ 28 ተማሪዎች ለእያንዳንዳቸው ከ15ሺህ እስከ 10 ሺህ እንዲሁም በሪሚዲያል ዩኒቨርስቲ ለሚገቡ 116 ተማሪዎች ለእያንዳንዳቸው 3ሺህ ብር የገንዘብ ድጋፍ ማድረጉንም አቶ ኮሬ ጨምረው ገልፀዋል ።

ተማሪዎቹ በሰጡት አስተያየት ጋበር የበጎ አድራጎት ድርጅት ባደረገላቸው ድጋፍ መደሰታቸውን ጠቁመው ይህም ድጋፍ ይበልጥ ውጤታማ ሆነን ለራሳችን ፡ ለአካባቢያችን ብሎም ለሀገራችን እንድጠቅም እገዛ የሚያደርግልን የሞራል ስንቅ ነው ብለዋል ሲል የዘገበው የእዣ ወረዳ መንግስት ኮሚኒኬሽን ጉዳዮች ፅ/ቤት ነው።